Ambasada vlerëson “bashkëpunimin e shkëlqyer” me Kosovën për ekstradimin e Liridon Masuricës

Ditën e djeshme u bë e ditur se një person i dyshuar, shtetas i Kosovës, është ekstraduar në ShBA për t’u përballur me drejtësinë. Siç ka raportuar Klankosova.tv gjatë ditës së djeshme, i dyshuari në këtë rast është Liridon Masurica nga Gjilani, i njohur edhe si “@blackdb”, i cili ka qenë administratori kryesor i “BlackDB.CC”, që është tregu kriminal online. Masurica ngarkohet për mashtrim dhe vjedhje të identitetit të qytetarëve, teksa Prokurori i Shteteve të Bashkuara, Gregory Kehoe, tha se mbi të rëndon një akuzë e komplotit për të kryer mashtrime me pajisje të qasjes dhe pesë akuza për përdorim mashtrues të 15 ose më shumë pajisjeve të qasjes së paautorizuara. Ambasada e ShBA-së në Kosovë ka shkruar për këtë rast, duke vlerësuar lart bashkëpunimin mes dy vendeve, gjë e cila thotë se sigurinë publike dhe i bën dy vendet më të sigurta. “Bashkëpunim dhe koordinim më i shkëlqyer midis Shteteve të Bashkuara dhe Kosovës sipas Traktatit tonë të Ekstradimit. Një i pandehur është ekstraduar me sukses në Shtetet e Bashkuara për t'u përballur me drejtësinë me akuzat për viktimizimin e qytetarëve amerikanë”. “Jemi mirënjohës ndaj autoriteteve të Kosovës për mbështetjen e tyre të vazhdueshme. Kjo përpjekje e përbashkët përmirëson sigurinë publike dhe i bën të dy kombet tona më të sigurta”, ka thënë Ambasada Amerikane në Prishtinë. Nëse Masurica shpallet fajtor për të gjitha akuzat, ai do të përballet me një dënim maksimal prej 55 vjetësh burgim, teksa i njëjti është arrestuar nga autoritetet në Kosovë më 12 dhjetor të vitit 2024, ndërsa është ekstraduar në Shtetet e Bashkuara në përputhje me traktatin e ekstradimit midis ShBA-së dhe Kosovës. LEXONI MË SHUMË https://klankosova.tv/ky-eshte-liridon-masurica-qe-u-ekstradua-ne-shba-si-administrator-kryesor-i-tregut-kriminal-online/ https://klankosova.tv/masurica-krijoi-qasje-ilegale-ne-50-kredit-kartela-e-ne-250-llogari-per-me-pak-se-1-vit-12/ https://klankosova.tv/ekskluzive-dosja-e-kosovarit-liridon-masurica-i-ekstraduar-ne-shba/