Lajmet e fundit
Skenarët e protestës së thirrur nga Sali Berisha mbahen sekret nga grupi organizator, por pak orë para se protestuesit të mblidhen poshtë zyrës së Edi Ramës, në kryeministri po kryhen punë të shpejta.
Dera e kryeministrisë është fortifikuar, ndërkohë masa u morën edhe për një marshim të mundshëm drejt godinës së parlamentit, i cili njoftoi se ka një rend dite të gjatë dhe seanca plenare kap edhe orët e pasdites.
Vetë Sali Berisha la të hapur çdo skenar.
“Gjithnjë protesta ka skenarin e vet. E rëndësishme është që ne të japim mesazhin tonë të fuqishëm se shqiptarët nuk do ta tolerojnë më këtë regjim, i cili s’meriton të ekzistojë absolutisht as edhe një ditë të vetme”, tha Sali Berisha, shkruan Top Channel, transmeton Klankosova.tv.
Kjo është protesta e parë kombëtare e thirrur nga Sali Berisha, që kërkon të largojë Edi Ramën nga pushteti përmes rrugës.
“Kjo është protesta që inauguron procesin e largimit të Edi Ramës nga pushteti. Çka do të thotë se protestat ndalen vetëm atëherë kur realizojnë qëllimin madhor”, tha Sali Berisha.
Tubimi i thirrur nga Sali Berisha bëri që Ambasada Amerikanë tu kërkoi qytetarëve të saj të bëjnë kujdes dhe të rrinë larg zonës ku mbahet protesta, pasi ajo mund të mund të jete e dhunshme.
