Alonso e komenton me spica kalimin e Hamiltonit te Ferrari

Piloti i Aston Martin në Formula 1, Fernando Alonso e ka komentuar paksa si me kunja zgjedhjen e Lewis Hamiltonit që t’i bashkohet Ferrarit në vitin e ardhshëm. “Nuk ishte ëndrra e tij e fëmijërisë 12 muaj më parë, apo jo? Ose dy muaj më parë, supozoj, për shkak se kishte një ekip tjetër”, ka thënë Alonso. Megjithëse, Alonso thotë se Hamiltoni mund të luftojë me Max Verstappenin e Red Bullit për kampionatin. “Shpresoj se ai do ta shijojë këtë eksperiencë. Është një ekip special, por është më e veçantë nëse fiton”. “Kjo është ajo gjëja që ju duhet të fitoni, dhe ka disa vite që ata kanë një bolid të shpejtë dhe ishin duke luftuar për gjëra të mëdha dhe ndoshta Lewis mund të shtoj përbërësin për të luftuar për kampionatin”, ka vijuar Alonso. Përndryshe, Hamiltoni trazoi botën e makinave të shpejta kur vendosi të largohet nga Mercedesi dhe t’i bashkohet Ferrarit në vitin e ardhshëm. Piloti britanik thuhet se do të përfitojë rreth 100 milionë euro, teksa ka nënshkruar kontratë dyvjeçare. Ferrari pati rritje enorme të vlerës në bursë në momentin kur vetëm po përflitej për nënshkrimin e Hamiltonit. /Klankosova.tv.