Aktorja Carrie Fisher vdes në moshën 60 vjeçare

Aktorja e njohur, Carrie Fisher e njohur edhe si princesha Leia Organa e Star Wars ka ndërruar jetë në moshën 60 vjeçare. Kjo u bë e ditur përmes një deklarate që ka bërë zëdhënësi i familjes, Simon Halls në emër të të bijës së Fisher, Billie Lourd. “Me dhimbje të thellë, Billie Lourd konfirmon se nëna e saj e dashur, Carrie Fisher ka ndërruar jetë në orën 8:55 në mëngjes. Ajo merrte shumë dashuri gjithandej botës, dhe do të na mungojë të gjithëve”,  thuhet në deklaratë, transmeton Klan Kosova. Në deklaratë poashtu thuhet se familja i falenderon të gjithë për lutjet dhe ngushëllimet. Fisher ishte duke fluturuar nga Londra për në Los Angeles ditën e premte, më 23 dhjetor kur ajo kishte pësuar një sulm në zemër. Ajo ishte dërguar menjëherë në spitalin më të afërt ku ishte trajtuar dhe më vonë ishte raportuar se gjendja e saj ishte stabile.