Aktakuzë ndaj tre personave, bënë dallavere me konkurs të Trepçës

Është ngritur aktakuzë ndaj tre personave. Prokuroria Themelore në Mitrovicë, njofton se A.H, E.M dhe B.A akuzohen se kanë bërë dallavere me një konkurs të shpallur në janarin e vitit 2020 në ndërmarrjen Trepça. "Të njëjtit, kanë shkelur rregulloren e vlerësimit gjatë intervistimit me gojë të kandidatëve, ashtu që në vend të vlerësimit për çdo pyetje të saktë me 20 pikë siç rregullohet në udhëzim administrativ, në rastin konkret të pandehurit i kanë vlerësuar kandidatët me nga 25 pikë për pyetje në total me mbi 100 deri 300 pikë, duke i sistemuar në vende pune dhe themeluar marrëdhënie të punës me shtatë persona, dhe me këtë veprim kandidatëve tjerë u ka mohuar të drejtën për punësim dhe kushte të njëjta ashtu siç parashihet me ligj", thuhet në njoftimin e organit të akuzës në Mitrovicë transmeton Klankosova.tv Me këto veprime, të pandehurit A.H., E.M., dhe B.A., kanë kryer veprën penale e cila u vihen në barrë. Prokurori i Shtetit, i ka propozuar gjykatës që të pandehurit t`i shpallë fajtor për veprën e kryer penale dhe t`i dënojë sipas ligjit. Tre të pandehurit akuzohen për vepren penale "Cenimi i të drejtave të punësimit dhe papunësisë“.