Lajmet e fundit
Prokuroria Themelore në Ferizaj, ka ngritur aktakuzë ndaj 15 personave, ku nëntë prej tyre janë shtetas të Kosovës e gjashtë shtetas të Turqisë, të cilët gjenden në paraburgim nga maji i vitit 2022, të cilëve iu janë sekuestruar rreth 67.5 kilogram heroinë dhe 25.5 kilogram narkotikë të llojit morfinë dhe kodein.
Sipas aktakuzës, ekziston dyshimi se që nga muaji prill e deri më 23 maj 2022, ndërsa prokuroria ka dhënë detaje në lidhje me ngjarjen.
“Paautorizim në shtëpinë e të pandehurit B.H., në fshatin Firaj, komuna Shtërpcë dhe në shtëpinë e të pandehurit M.Sh., në fshatin Varosh, komuna Ferizaj, të njëjtit, prodhojnë substanca narkotike të llojit heroinë dhe atë 67.5 kilogram, ndërsa 25.5, kilogram nuk arrijnë ta prodhojnë, ashtu që të pandehurit S.Sh, A.D., V.N dhe S.Z.,organizojnë transportin e lëndës së parë të narkotikut të cilën e sjellin nga Irani përmes Turqisë-Greqisë dhe Maqedonisë Veriore, e vendosin në një depo në rrugën “Astrit Bytyqi”, pastaj improvizojnë një laborator për prodhimin e heroinës në shtëpinë e të pandehurit B.H., në fshatin Firaj”, thuhet në njoftimin e prokurorisë, transmeton Klankosova.tv.
Tutje, në njoftim thuhet se më 15 maj të vitit 2022, në Kosovë vijnë të pandehurit H.I., dhe M.Y., dhe më 18 maj 2022, fillon procesi i prodhimit të heroinës.
“Mirëpo më 20 maj 2022, pasi dyshojnë se policia iu ka vënë në gjurmë, të pandehurit A.D., B.H., dhe V.N., nga Firaja tërheqin narkotikun të cilët deri në atë kohë e kishin prodhuar dhe pjesën tjetër të papërpunuar dhe i dërgojnë në fshatin Varosh, kurse më 23 maj 2022, policia bën bastisjen e shtëpisë së të pandehurit M.Sh., ku gjendet sasia prej 67.71, kilogram narkotik të llojit heroinë, ndërsa më datën 30 gusht 2022, në një shtëpi të pabanuar në fshatin Doganaj gjendet edhe një sasi prej rreth 25.5 kilogram narkotik të papërpunuar gjegjësisht, me përbërje morfinë dhe kodein, me çka kryen veprën penale “Prodhimi dhe përpunimi i paautorizuar i narkotikëve, substancave psikotrope, analoge apo veglave, pajisjeve apo materialeve narkotike””, thuhet tutje në njoftimin e prokurorisë, përcjell Klankosova.tv.
Prokuroria Themelore në Ferizaj, me rastin e ngritjes së aktakuzës, i ka propozuar Gjykatës kompetente që të pandehurit të shpallen fajtor dhe të dënohen sipas ligjit për veprat penale të cilat i’u vihen në barrë.
