Ajeti debuton në fundjavë

Arlind Ajeti, mbrojtësi 21-vjeçar, i cili firmosi me Frosinonen në fund të Nëntorit i këshilluar nga trajneri i Shqipërisë, Gianni De Biasi, mund të debutojë te skuadra italiane që këtë fundjavë ndaj Chievos në kuadër të javës së 15-të. Orët e fundit ka mbërritur nga Federata Zvicerane e Futbollit kartoni i mbrojtësit shqiptar, që e shndërron me të gjitha efektet futbollist të Frossinones. Trajneri Roberto Stellone, kishte parashikuar aktivizimin e Ajetit që në përballjen e fituar në shtëpi me Veronën, por për shkaqe proceduriale që kishin të bënin me transferimin e kartonit të futbollistit, debutimi i lojtarit në Serinë A u shty për javët pasardhëse. Arlind Ajeti ka qenë pjesë e Baselit deri në fund sezonit 2014-2015, më pas mbeti futbollist i lirë, pasi nuk arriti marrëveshjen me kampionët e Zvicrës për rinovimin e kontratës. Gjatë merkatos së verës, futbollisti i Kombëtares Shqiptare nuk firmosi për asnjë skuadër, derisa në Nëntor gjeti gjuhën e përbashkët me Frossinonen. Gjithsesi gjatë kësaj periudhë është grumbulluar rregullisht nga Gianni De Biasi në Kombëtare, madje duke qenë një nga pikat e forta në mbrojtjen kuqezi në kualifikim historik në finalet e “Francë 2016″.