AGK: Nga nesër gazetarët, kameramanët dhe fotoreporterët mund të aplikojnë për vaksinim ndaj COVID-19

Asociacioni i Gazetarëve të Kosovës ka njoftuar se nga dita e nesërme të gjithë gazetarët, kameramanët dhe fotoreporterët mund të aplikojnë për imunizim me vaksinat kundër COVID 19. Në njoftimin për media është theksuar se kjo është arritur pas kontakteve të shpeshta të AGK-së me Ministrinë e Shëndetësisë, njofton Klankosova.tv. “Sot komiteti respektiv ka marr vendim për përfshirje të gazetarëve me prioritet për imunizim! Me siguri që nga nesër edhe platforma e – Kosova do e mundësoj versionin me ketë ndryshim, dhe do njoftoheni sapo të jetë bërë përditësimi i ndryshimit në platformën e cekur”, thuhet në njoftimin e ministrisë për AGK-në. AGK-ja e sheh si tejet të rëndësishëm këtë vendim pasi që gazetarët kanë kontribuuar në vazhdimësi gjatë pandemisë, si me informim të drejtë, ashtu edhe në parandalimin e shpërndarjes së dezinformatave. “E tërë veprimtaria e tyre është shtrirë në vijën e parë të frontit, së bashku me punonjësit e tjerë esencial. Kanë raportuar nga vatrat e infeksionit që para shfaqjes së rasteve të para me COVID-19 në Kosovë, kanë mbuluar ngjarjet politike dhe sociale gjithashtu, në mënyrën më profesionale të mundshme, në ndërkohë që janë përballur me një të panjohur për të gjithë ne”.