Adresimi i Putin ngrit çmimin e naftës në botë, Berjani paralajmëron lëvizje edhe në Kosovë

Çmimet e karburanteve në Kosovë kanë pësuar rënie të lehtë ditëve të fundit. Sot, një litër naftë në vend ka çmimin 1.58 cent, ndërsa benzina 1.32 cent. Së fundmi në botë, nafta u rrit për më shumë se 2% pasi presidenti rus, Vladimir Putin njoftoi një mobilizim të pjesshëm ushtarak, duke përshkallëzuar luftën në Ukrainë dhe duke ngritur shqetësimet për furnizimin e mëtejshëm me naftë dhe gaz. Mirëpo, sipas kryetarit të Shoqatës së Naftëtarëve të Kosovës, Fadil Berjani, deri sa të ketë luftë, nuk do të ketë stabilitet të çmimeve të derivateve. Mes tjerash Berjani i tha Klankosova.tv, se do të këtë lëvizje të mëdha të çmimit të derivateve. "Lufta Ukrainë dhe Rusi ka ndikim në rritjen e derivateve në tërë globin. Dhe deri sa të përfundojë lufta do të kemi rritje të derivateve apo treg jo stabil. Do të jetë një treg me lëvizje të mëdha të çmimit", deklaroi ai. Kosova nuk e di se me çfarë lëvizje të çmimeve do të përballët ditëve të ardhshme, por sipas kryetarit të SHNK-së, tregu i derivateve është në duart e SHBA-së dhe nuk kanë rëndësi deklaratat e Putinit. "Nuk mundemi të paragjykojmë se çfarë çmime do të kemi në ditët në vijmë se kemi lëvizje të mëdha të çmimit në brezat ndërkombëtare dhe edhe të ne po reflekton. Deklarata e Putinit është deklaratë boshe. Tregu i derivateve është në duart e SHBA-së. Ne patëm një rënie të theksuar të çmimit kur presidenti Biden nxori në shitje rezervat shtetërore dhe patëm një ulje të çmimit rreth 20 cent", u shpreh Berjani. Kujtojmë se Qeveria e Kosovës ka miratuar në fund të qershorit udhëzimin administrativ për rregullimin e çmimeve të derivateve të naftës dhe karburanteve të ripërtëritshme si dhe masave tjera mbrojtëse.