Lajmet e fundit
Kryetari i Lidhjes Demokratike të Kosovës Lumir Abdixhiku, ka bërë një reagim tjetër pas zhvillimeve të fundit në këtë parti.
"Më shumë se dorëheqja nuk kam çfarë të ofroj!
Kam dëgjuar dhe jemi dëgjuar me njëri-tjetrin me vëmendje. Çdo zë, çdo kritikë dhe çdo shqetësim, me orë të tëra. Pesë orë e gjysmë. Në fund kemi dalur me përgjegjësi të plotë dhe me dinjitet para qytetarëve për të shprehur jo mendimin e një individi, as timin, por të shumicës dërmuese, ashtu siç u pajtuam pas pesë orë diskutimi", deklaroi Abdixhiku.
Abdixhiku theksoi se ai dhe kryesia e LDK-së nuk do t'i shmangen asnjë përgjegjësie.
"Kam marrë hapin më moral që një kryetar mund ta marrë: kam ofruar dorëheqjen time. Kam hapur rrugën për secilin që ka pretendime. Jeni të lirë të garoni; në Kuvend e keni mundësinë. Tani vendimi nuk është më i imi, është i LDK-së. Dua ta them qartë; nuk jam i lidhur pas pozitës. Jam i lidhur pas shtëpisë. Dhe shtëpia ruhet me rregull, me dinjitet dhe me besim në anëtarësinë e saj dhe në secilën kërkesë të tyre", theksoi ai.
"Më shumë se dorëheqja nuk ka çfarë të ofrojë një politikan. Eliminimet politike mund të jenë legjitime si aspiratë, por edhe për to vendos anëtarësia si tërësi, jo ne individualisht. Kemi thirrur Kuvendin. Aty flasim hapur. Aty propozojmë hapur. Aty vendosim hapur. Le ta presim Kuvendin. Le ta mbajmë debatin para shtëpisë sonë, me orë të tëra, me ditë të tëra po qe nevoja. Jemi të njohur për demokraci dhe liri veprimi. Le të sillemi me përgjegjësi. Sepse LDK nuk është reagim i çastit, nuk është as protagonizëm i ditëve të vështira; edhe më pak vendim i rrjeteve sociale e duartroktijeve të kundërshtarëve. LDK është institucion", shtoi numri një i LDK-së transmeton Klankosova.tv.
Kreu i Lidhjes Demokratike shtoi se fatin e tij politik e vendos përballë LDK-së e jo mbi LDK-në.
"Dhe çfarëdo vendimi që merr Kuvendi, do ta respektoj me nder dhe qetësi Deri atëherë, le të sillemi si mbrëmë e si deri tash, pa dramë e pa protagonizëm, ballëhapur e me dinjitet. Sepse mbi çdo emër është LDK. Dhe kështu na takon të gjithëve", përfundon shkrimi i Lumir Abdixhikut transmeton Klankosova.tv.
