Abdixhiku nga Peja, Kurtit: Urën e Saradranit do ta shndërrojmë në monument të mbrojtur

Kandidati i LDK-së për kryeministër, Lumir Abdixhiku, ka mbajtur një takim elektoral gjatë ditës në Pejë. Nga atje, Abdixhiku tha se populli para katër viteve ia dha “pushtetarëve në ikje fuqinë më të madhe demokratike”, por edhe 12 miliardë euro buxhet. E, siç tha ai, me 12 miliardë euro buxhet dhe 51%, puna e vetme e kryeministrit aktual, Albin Kurti, është “një urë dy metërshe në Saradran, të cilën pas 9 shkurtit do ta shndërrojmë në monument të mbrojtur...”. “Para katër viteve, populli i Kosovës u dha pushtetarëve në ikje fuqinë më të madhe demokratike. U dha plot 51% dhe në demokraci, 51% do të thotë shumicë, në demokraci 51% është e barabartë me 100%”. “U dha besa edhe 12 miliardë euro buxhet, për katër vjet si asnjë partie tjetër në histori. Me 12 miliardë dhe 51%, puna e vetme është një urë dy metërshe në Saradran, të cilën pas 9 shkurtit do ta shndërrojmë në monument të mbrojtur si muze, si muze e rikujtim se mund t’i kesh krejt e të mos bësh bash asgjë”, tha ai. Nga Peja, Abdixhiku thumboi VV-në edhe për perdet e zeza që po i përdor për ta mbuluar hapësiren boshe nëpër salla. “’Karagaçi’ është bjeshkë, sikurse bjeshkët e Rugovës. Duhet matur mirë e mbar përpara se t’ia mësysh asaj. Por, kur e nënvlerëson, kur e lë atë thatë, kur e mbush me perde të zeza për rreth, pra ia humb të gjithë magjinë e madhështinë, kjo sallë edhe ta humb kontrollin”.