54-vjeçari nxirrte gjak nga goja: “Mjekët më neglizhuan” (VIDEO)

Mbrëmjet i kalon herë duke punuar e herë i vetëm në banesë. Malli për familjen që i jeton jashtë shtetit po ia vështirëson jetën. Mirëpo mbrëmja e 5 marsit qe më e parehatshme se zakonisht për Xhafer Mehmetin. Kjo për shkak se nuk po ndihej mirë dhe të vjellat me gjak po e shqetësonin. Ora kaloi edhe mesnatën e gjendja e Xhaferit nuk po përmirësohej. 54-vjeçari merr telefonin dhe fillon që të mundohet e të bie në kontakt me qendrën më të afërt të ndihmës mjekësore. Biseda me recepsionin e QKMF-së “Fatmir Krasniqi” në Bresje, për KIKS-in Xhaferi tha se nuk i ndihmoi aspak. Ora po shënonte afër 02:00 pas mesnate dhe kishin kaluar dy orë që kur Xhaferi kishte telefonuar emergjencën për ndihmë. Në telefonatën prej policisë që e mori pas dy orësh, dëgjoi vetëm të bërtitura dhe akuza kundrejt tij. Ani pse Xhaferi ishte në gjendje jo të mirë shëndetësore e po priste ndihmë, policia po e akuzonte në telefon se po i gënjen për adresë. Ndihmën mjekësore nuk e mori të menjëhershme edhe kur pas dy orësh ekipi emergjent e i Policisë arriti në banesën e tij. Policit që kishte qëlluar në ndërrim pune atë natë, nuk po i dilte e keqja me Xhaferin. Sipas 54-vjeçarit, ai vazhdonte me akuza dhe nuk po i jepte hapësirë mjekes që të fillonte kontrollën. Ani pse Xhaferi mendoi se çdo gjë u rregullua e më në fund po fillonte kontrollimi i tij mjekësor, një gjë e tillë nuk ndodhi. Këtë herë mjekja e Emergjencës po i kërkonte Xhaferit që të bënte pagesën për makinën emergjente, ani pse dora e saj nuk e kishte prekur ende pacientin që po kërkonte ndihmë që dy orë. Pas shumë debateve me zyrtarët policorë dhe mjekët kujdestarë, që sipas Xhaferit nuk po e bënin punën si duhet, 54-vjeçari u udhëzua që të zbresë poshtë banesës për ta nisur për në QKMF. Në rrëfimin e tij ekskluziv për KIKS Kosovën, Xhaferi tha se për në qendër mjekësore e dërguan me makinë të policisë, ani pse makina emergjente qëndronte para banesës së tij. Mosmarrëveshja me policët i kushtoi shtrenjtë Xhafer Mehmetit. Kjo për faktin se edhe pse në gjendje të keqe shëndetësore, policia atë e dënoi me 500 euro gjobë. Si arsyetim në fletëgjobitje, policët kishin shkruar se Xhaferi kishte shkaktuar zhurmë pas orës 22:00. Sipas Xhaferit, ai dënim u bë si shenjë hakmarrjeje kundrejt tij sepse nuk kishte pasur asnjë ankesë për zhurmë. /Klankosova.tv https://youtu.be/DS73sNhqr2c