"Haradinaj do të lirohet më 27 prill"

Ramush Haradinaj është ndalur padrejtësisht dhe po mbahet padrejtësisht. Andaj, lirimi i tij do të ndodhë më 27 prill. Kështu ka thënë për Ekonomia Online, deputetja e Aleancës për Ardhmërinë e Kosovës, Teuta Haxhiu, e cila ka shprehur bindjen se ish-kryeministri Haradinaj përfundimisht do të lirohet të enjten dhe do të kthehet në Kosovë. “Ne presim që më 27 të këtij muaji lirimin e plotë të zotit Haradinaj. Edhe pse kanë kaluar gati katër muaj prej ku ai mbahet atje padrejtësishtë. Vendimi do të jetë në anën e zotit Haradinaj, në anën e qytetarëve”, ka thënë ajo. Ajo ka thënë se pafajësia e liderit të AAK-së është dëshmuar dy herë edhe në Gjykatën e Hagës. Andaj, vlerëson së është momenti i fundit që të triumfojë e vërteta dhe drejtësia. Deputetja Haxhiu ka thënë se ndalimi i Haradinajt në Colmar të Francës është krejtësisht politik dhe se nuk ka të bëjë asgjë me atë çfarë akuzohet. Seanca e radhës ndaj Ramush Haradinajt do të mbahet të enjten më 27 prill. Autoritetet në Serbi vazhdimisht kanë kërkuar ekstradimin e tij në këtë shtet, gjë e cila po kundërshtohet ashpër nga institucionet kosovare.