42 terroristët e Banjskës nuk mund të gjykohen në mungesë, thotë ish-kryetari i Supremes

Seanca për të akuzuarit në rastin e sulmit terrorist në Banjskë është shtyrë, ndërsa ish-kryetari i Gjykatës Supreme, Fejzullah Hasani, ka shpjeguar se, për shkak të formulimit të ligjit, gjykimi në mungesë për 42 të akuzuarit nuk është i mundur. Hasani shpjegoi se, sipas ndryshimeve ligjore të vitit 2023, gjykimi në mungesë është i lejuar në disa raste, por ka kushte specifike që duhet të plotësohen. “Në vitin 2023 ka qenë i përjashtuar gjykimi në mungesë, por ndryshimet e ligjit në vitin 2023 e kanë paraparë mundësinë gjykimit në mungesë. Por aty janë kushte specifike kur mund të mbahet gjykimi në mungesë. Sipas nenit 303 për secilën vepër penale mund të zhvillohet gjykim në mungesë me kush që i pandehuri ka qenë në shqyrtimin e parë fillestar dhe nuk ka ardh më ose në shqyrtimin kryesor. Por paragrafi 7 e ka një përjashtim dhe thotë kur bëhet fjalë për vepra penale nga neni 104 , pavarësisht kushteve nga paragrafi 2, 2.2 dhe 2.3 mund të mbahet gjykimi në mungesë. Për veprat penale nga neni 104 atje thotë nuk parashkruhen krimet e luftës, gjenocid dhe krimet kundër njerëzimit si dhe vrasjet e rënda”. “Çdo vepër penale i ka elementet e përgjithshme dhe të posaçme. Dhe në bazë të elementeve të posaçme janë edhe emërtimet nuk ka vepër penale me emër të njëjtë. Ligji thotë vrasje e rëndë, ne kemi vetëm një. Neni 173 i Kodit Penale të Kosovës. Nuk ka vepër penale tjetër, vrasje të rëndë. Pasoja, vdekjet prodhojnë shumë vepra penale. Prodhojnë këto që akuzohen terrorizmi, kundër rendit kushtetueses, kryengritje e armatosur… Por nuk janë vrasje të rënda, vrasje e rëndë është vetëm një”, ka thënë Hasani në “Dukagjini”. Megjithatë, sipas Hasanit, për veprat e terrorizmit dhe ato kundër rendit kushtetues, si në rastin e të akuzuarve të Banjskës, nuk ka mundësi të zhvillohet një gjykim në mungesë, për shkak të formulimit aktual të ligjit. “Më këtë formulim ligjor siç është nuk ka asnjë mundësi të mbahet gjykimi në mungesë. Paradoksi qëndron kur është bërë ligji i 2023, dikush që ka qenë prokuror, për mua me dije diskutabile, e ka ndërtuar atje një normë që thotë prokuro mund të ngrit aktakuzë për secilën vepër penale nëse është i paarritshëm. Çfarë logjike ka të ngrit prokurori aktakuzë vetëm ta zhvendos lëndën në gjykatë, kur gjykata s’mund ta gjykojë? Këtu është një paradoks që ekziston në Kodin Penal. Supremja jep mendim juridik vetëm atëherë kur norma është e paqartë. Dhe kur norma ka aplikim divergjent në gjykatat e Kosovës… Aktakuza është shumë mirë e formuluar por kur është ndërtuar norma në Kodin e Procedurës Penale në 2023… Është dashtë në normë të mos i referohen nenin 104 fare, por me në mënyrë eksplicite më shkru të gjitha veprat penale kundër rendit kushtetuese, atëherë nuk ka pasur problem”, ka thënë Hasani.