Lajmet e fundit
Mbi 40 mijë banor u lanë në terr. Rahoveci qe 3 javë është në telashe me ndërprerjet e energjisë elektrike, që për banorët ka nisur të bëhet e padurueshme.
Sipas Diamant Hotit, banor i fshatit Ratkoc, përveç që rrymë nuk kanë shumicën e kohës, por edhe në rastet kur ka - rryma është aq e dobët saqë pajisjet shtëpiake shpesh po u dëmtohen.
Fshati me rreth 7 mijë banorë dhe disa biznese, sipas Hotit është në alarm ngase puna është vështirësuar edhe për bizneset. Halli tjetër i Diamant Hotit është fakti që rryma edhe është shtrenjtuar.
Alarmante situatën e cilëson edhe përfaqësuesi i fshatit Ratkoc, Beq Shala. Sipas tij, as reduktime nuk ka sepse po të kishte ndoshta do të menaxhonin më mire situatën.
Sipas Shalës, edhe telefonatat e banorëve në drejtim të tij nuk po ndalen, por që fatkeqësisht thotë se nuk ka se çfarë të bëjë as ai, ndonëse është kryetari i fshatit.
Jo vetëm banorët, por dhe bizneset në qendër të Rahovecit kanë të njëjtin problem. Sipas Naser Kadriut, pronar i lokalit “N’style”, ndërprerjet e rrymës kanë ndikuar te puna e tij e përditshme tejet shumë.
Sipas Drejtorit të Shërbimeve Publike në Rahovec, Përparim Krasniqit, në disa fshatra ka mungesë totale të energjisë dhe pavarësisht presionit institucional, ende nuk kanë përgjigje konkrete nga organet përgjegjëse.
