23-vjeçari i armatosur lëvizte me taksi për të shmangur kontrollet, arrestohet

Policia e Tiranës ka arrestuar një 23-vjeçar, i cili lëvizte i armatosur në qytet, duke përdorur taksi për të mos u diktuar. “Si rezultat i administrimit të menjëhershëm të informacioneve të siguruara në rrugë operative, se një shtetas që lëvizte me taksi, posedonte 1 armë zjarri, shërbimet e Komisariatit të Policisë Nr. 4 finalizuan operacionin “Destinacioni”. Gjatë operacionit, u ndalua në Rrugën e Dibrës, taksia me të cilën lëviznin shtetasi P. Gj., 23 vjeç dhe kushëriri i tij, shtetasi Xh. Gj., 24 vjeç, të dy banues në Lezhë. Nga kontrollet, në çantën e 23-vjeçarit, u gjet 1 armë zjarri pistoletë me municion”, tha policia. Në përfundim të veprimeve procedurale në lidhje me këtë rast, shtetasi P. Gj. u arrestua për veprën penale “Mbajtja pa leje dhe prodhimi i armëve, armëve shpërthyese dhe i municionit”, ndërsa 24-vjeçari u procedua në gjendje të lirë, për veprën penale “Moskallëzimi i krimit”, raporton A2CNN, transmeton Klankosova.tv. Materialet procedurale iu referuan Prokurorisë së Tiranës, për veprime të mëtejshme.