Musk pyet ndjekësit në Twitter nëse duhet të shesë 10% të aksioneve të Tesla

Shefi Ekzekutiv i Tesla Inc, Elon Musk, i pyeti të shtunën 62.5 milionë ndjekësit e tij në Twitter në një sondazh nëse ai duhet të shesë 10% të aksioneve të Tesla. Ai u zotua se do t'i përmbahet rezultateve të sondazhit, sido që të shkojë. Sondazhi mori rreth 2 milionë përgjigje në shtatë orë pas postimit, me 55% të të anketuarve që miratuan propozimin për shitjen e aksioneve. Votimi është planifikuar të përfundojë rreth orës nëntë të mbrëmjes të dielën. Personi më i pasur në botë kishte thënë më parë se mund të përballet me një faturë tatimore “të lartë” këtë vit pasi duhet të shfrytëzojë shumë opsione të aksioneve që do të mbarojnë vitin e ardhshëm. "Vini re, unë nuk marr rrogë në para ose bonus askund. Unë kam vetëm aksione, kështu që e vetmja mënyrë që unë të paguaj taksat personalisht është të shes aksione," tha Musk në Twitter të shtunën, shkruan Reuters, transmeton Klankosova.tv. "Shumë është bërë kohët e fundit nga fitimet e pazbatuara që janë një mjet për shmangien e taksave, kështu që unë propozoj të shes 10% të aksioneve të Tesla," tha ai, duke iu referuar një "takse miliarderësh" të propozuar nga demokratët. Musk kishte kritikuar propozimin, i cili do të prekte 700 miliarderë dhe do të vendoste taksa për fitimet afatgjata kapitale mbi pronat e tregtueshme, pavarësisht nëse ato janë shitur apo jo. Aksionet e Musk në Tesla arrijnë në rreth 170.5 milionë që nga 30 qershori dhe shitja e 10% të aksioneve të tij do të arrinte afërsisht 21 miliardë dollarë, sipas llogaritjeve të Reuters.