Camavinga dëshiron të qëndrojë te Real Madridi

E ardhmja e Eduardo Camavinga në Real Madrid vazhdon të jetë në qendër të vëmendjes së mediave sportive, mes spekulimeve të shumta për një largim të mundshëm nga klubi madrilen gjatë merkatos së ardhshme. Sipas raportimeve nga Spanja, mesfushori francez thuhet se ka dëshirë të vazhdojë aventurën e tij në Madrid dhe nuk e konsideron largimin si prioritet në këtë fazë të karrierës së tij, pavarësisht interesimit të madh që vjen nga klube të ndryshme evropiane, transmeton Klankosova.tv. Megjithatë, situata e tij brenda skuadrës së Real Madridit mbetet ende e paqartë. Nga Anglia, disa prej skuadrave më të mëdha të Premier League po e ndjekin me kujdes zhvillimin e situatës së tij, duke e vlerësuar si një profil shumë të përshtatshëm për intensitetin dhe stilin e lojës që karakterizon këtë kampionat. Interesim për shërbimet e tij ka shprehur edhe Paris Saint-Germain, megjithatë për momentin nuk raportohet për ndonjë ofertë konkrete, me gjithçka që mbetet në fazë vlerësimi dhe monitorimi.