Bashkëpunëtorët për Adem Mikullovcin: Aktor legjendar, njeri i afërt, punëtor i madh e tepër profesionist

Adem Mikullovci sot lëshoi perdet e skenës së teatrit të madh - jetës. Aktori i madh dha frymën e fundit në moshën 81 vjeçare në Prishtinë. Për bashkëpunëtorët e tij nga fusha e artit, ai mbetet shembull se si duhet puna. Teuta Krasniqi thotë se “Baca Adem”, siç e thërret ajo, ishte njeriu më punëtor që njihte. “Ka pasur raste ku na ka thirrur edhe në orën 05:00 të mëngjesit dhe na ka thënë “çohuni se shkoi dita”, është shprehur aktorja Krasniqi për klankosova.tv. “Ka qenë shumë punëtor i madh, tepër profesionist. Nuk ka qenë më i urti. Ka qenë kritikues, por këtë e ka bërë gjithmonë kur është dashur”. “Ai ka qenë i pari që më ka ftuar të luajë në një projekt në aktrim, kur unë isha vetëm 16-17 vjeçare. Ma ka besuar rolin, ishte një ngjarje shumë e madhe për mua. Në fund ma ka dhënë një zarf ku ishte pjesa e honorarit. Përveç që ishte privilegj të luaja, ai edhe më pagoi. Këtë ia kam përmend gjithmonë pastaj”. Vdekja e Mikullovcit për të është humbje e madhe për skenën kosovare. “Ka qenë aktor dhe regjisor që nuk ka hequr dorë kurrë prej qëllimeve të tij. Edhe kur ka qenë jo mirë më shëndetin ai ka qenë i pari që është ‘vizatuar’ në skenën e aktrimit. Ai ka qenë që e ka mësuar tekstin nga të parët. Para të gjithë neve që ishim shumë më të rinj” Krasniqi ka thënë se Mikullovcin e njihte që prej se ishte fëmijë, derisa ishin fqinj në lagjen Ulpiana në kryeqytet. Shumë thotë se e njihte edhe aktori tjetër kosovar, Naser Rafuna. “Kemi qenë shumë të afërt me njëri-tjetrin. I kemi ditur edhe detajet e fundit të jetës së njëri-tjetrit. E di jetën e tij në detaje”, është shprehur Rafuna. “Ishte aktor, profesionist i madh deri në pikën e fundit. E kishte humorin unik”. “Ai ka ditur që t’i përshtat me humorin e tij secilit. Ka qenë personifikim i lidhjes me njerëzit. Unë kam pasur me të kontakte ne vazhdimësi. Edhe në kohën sa ka qenë i sëmurë kam kontaktuar shpesh me të”. Për Rafunën sot skena e artit dhe komuniteti artistik ka humbur një njeri me vlera. Ai thekson se për njerëzit si Adem Mikullovci institucionet e kulturës duhet të bëjnë më tepër se që janë duke bërë, e që kanë bërë edhe për “Bacën Adem”. “Njerëzit si Adem Mikullovci që jetën ia kushtojnë teatrit, skenës, po harrohen shpejt. Ata nuk e meritojnë vetëm një pension 100 e sa euro në muaj. Duhet përkujdesje për ta. Nuk është se ka shumë të tillë”. Fjalë të zgjedhura për figurën e Adem Mikullovcit ka edhe bashkëpunëtori tjetër për shumë vjet, Donat Qosja. “Është aktor legjendar,  është njeri i paharrueshëm”, shprehet ai. “Ka qenë prej aktorëve me mendjhapur. E kemi konsideruar me të riun e grupit gjithmonë, sepse energjinë që ka pasur ka qenë e jashtëzakonshme”. Edhe Qosja thotë se pavarësisht dallimit të madh në moshë që kishin, Mikullovci ishte shumë i afërt me ta.