Zëvendësministri Hoti pjesë e Panairit të Librit në Frankfurt

Zëvendësministri i Kulturës, Rinisë dhe Sportit, Rexhep Hoti ka marrë pjesë sot në ceremoninë hapëse të edicionit të sivjetmë të Panairit të Librit në Frankfurt të Gjermanisë. Panairi i Librit në Frankfurt është ngjarja më e madhe e librit në botë. Me moton "Kjo është ajo që ne ndajmë", Flandra dhe Holanda  paraqitën një program të gjerë letrar dhe kulturor për mysafirët e nderit në hapjen solemne të panairit të Librit 2016 në Frankfurt, ku morën pjesë Mbreti dhe Mbretëresha e Holandës, Përfaqësues të Parlamentit Evropian, përfaqësues të lartë politik shtetëror të Gjermanisë, Holandës, Flandrës e më gjerë. Në këtë panair mori pjesë edhe Kosova ku Shoqata e Botuesve të Kosovës pati stendën e saj prezantuese, e cila është përkrahur nga Ministria e Kulturës, Rinisë dhe Sportit, transmeton Klan Kosova. Zëvendësministri Hoti ka viztuar edhe stendën e Kosovës ku u takua me përfaqësuesit e shoqatës dhe së bashku diskutuan rëndësinë e pjesëmarrjes së Kosovës në një panair të tillë siç është ky në Frankfurt. Në edicionin e sivjetmë të Panairit të Librit në Frankfurt po marrin pjesë  7,100 ekspozues nga më shumë se 100 shtete.