Zëri i viktimave të dhunës seksuale 20 vjet pas luftës

U deshën 15 vjet që politikanët kosovarë të thyejnë tabunë për viktimat e përdhunuara gjatë luftës në Kosovë. Kjo përkrahje ndaj kësaj kategorie nisi me presidenten e atëhershme Atifete Jahjaga e cila mori hapin e parë duke hedhur dritë mbi tmerret që po përjetonin shumë gra shqiptare nga Kosova, njofton Klan Kosova. "Kjo temë është mbajtur nën maskën e turpit për shkak të mentalitetit të vendit tonë dhe është mbajtur si një tabu", tha Jahjaga në një intervistë të mëparshme në Prishtinë. Agjencia e lajmeve me bazë në SHBA, Bloomberg, thotë që më në fund pas 20 vjetësh, viktimat e dhunës seksuale të luftës në Kosovë, po ngritin zërin e tyre dhe po gjejnë mbështetje. Duke trajtuar këtë çështje, në editorialin e lëshuar së fundi, rrëfehet për një 22 vjeçare shqiptare nga Gjakova, e cila u përdhunua sikurse edhe dy motrat e saj.

(Një portret i një viktime kosovare për përdhunim, e cila ka kërkuar që identiteti i saj të mbetet anonim).

Fotograf: Tori Ferenc/ Bloomberg

''Duke menduar që një shami e bardhë e vendosur në kokë do t’i fshehte asaj moshën e re për ta mbajtur të sigurt nga paramilitarët serbë, ajo u përdhunua, sikurse dhe dy motrat e saj'', shkruan në artikull.

Më tej theksohet se tmerret e konfliktit mes shqiptarëve dhe serbëve ende janë në zhvillim edhe pas dy dekadave pas ndërhyrjes së NATO-s, pasi derisa politikanët e Kosovës tani flasin hapur për viktimat e përdhunimit në ngjarje publike, deklaratat e tyre kundërshtohen nga udhëheqësit serbë. Përplasja e tillë e fundit publike ndodhi në Konferencën e Sigurisë të Mynihut në shkurt, kur presidenti serb Aleksandar Vuçiq ngriti dyshime rreth numrit të grave të përdhunuara të përmendura nga homologu i tij Hashim Thaçi në të njëjtën ngjarje. ''Vuçiq dhe Thaçi kanë qenë në bisedime për ta vendosur të kaluarën për të pushuar dhe për t'u përpjekur të integrohen me Bashkimin Europian. Autoritetet e Kosovës thonë se 20,000 gra kryesisht shqiptare janë keqtrajtuar nga ushtarët serbë. Kjo do të thoshte se viktimat e dhunës seksuale tejkalojnë 13.595 njerëz të vrarë në luftë. Militantë nga të dyja palët janë paditur për krime lufte'', është potencuar në artikull, njofton Klan Kosova. Po ashtu duke qenë se u deshën disa vite për të krijuar fonde për viktimat, kjo kategori që nga viti i kaluar mund të aplikojnë për të marrë një pension deri në 230 euro në muaj nëse aplikimi i tyre miratohet nga një komision. Deri tani mbi 1.300 gra kanë aplikuar dhe rreth 400 aplikime janë përpunuar, sipas ish-presidentes Atifete Jahjaga. "Duke e ditur mentalitetin tonë, nuk besoj se shumë prej tyre do të lajmërohen", është shprehur ajo, njofton Klan Kosova.