Zbardhet vrasja e Ramazan Matajt në Shkodër

Policia e Shkodrës ka zbardhur ngjarjen e ndodhur dy ditë më parë në fshatin Dragoç, ku u vra me armë zjarri 33-vjeçari Ramazan Mataj. Nga hetimet rezultoi se 29-vjeçari Arjon Hasaj, për motive të dobëta, ka qenë organizatori dhe ka kryer vrasjen e të riut. 29-vjeçari, nëpërmjet llogarive të rreme në rrjete sociale, ka komunikuar me Ramazan Mataj, për ta nxjerrë në pritë në fshatin Dragoç, ku dhe dyshohet se e ka vrarë. Sipas policisë, dyshohet se Ramazan Mataj kishte ndikuar për prishjen e marrëdhënieve bashkëshortore të motrës së autorit. Autori i dyshuar është ndihmuar nga vëllai i tij, Klisman Hasaj, për sigurimin e kushteve për të kryer vrasjen dhe për të fshehur armën e krimit. Pas krimit, dy vëllezërit e fshehën armën në një zonë të pyllëzuar dhe më pas e groposën në tokë në oborrin e banesës. Arjon Hasaj u arrestua për veprat penale “Vrasja me paramendim” dhe “Prodhimi dhe mbajtja pa leje e armëve, armëve shpërthyese dhe municionit luftarak”; Vëllai i tij, Klisman Hasaj, u arrestua për veprën penale “Sigurimi i kushteve dhe mjeteve materiale për të kryer vrasje”. Në drejtimin e Prokurorisë njofton policia, vijojnë hetimet për dokumentimin e plotë ligjor të kësaj ngjarjeje, raporton TopChannel.