Vushtrri: Dy peticione për një xhami

Në Kosova Direkt sonte është diskutuar për ndërtimin e një xhamie në Vushtrri. Banorët po e kundërshtojnë ndërtimin e saj me arsyetimin se aty janë edhe dy xhami të tjera, por kundër këtij mendimi janë Bashkësia Islame në Vushtrri. Shemsi Rrahimi nga Bashkësia Islame, ka thënë se qytetarët në peticion kanë kërkuar ndërtimin e një fushe sportive, duke mos e ditur se ajo tokë është e Bashkësisë Islame. Ndërsa janë 127 qytetarë që e kanë nënshkruar peticionin me atë të të cilit kundërshtojnë ndërtimin e kësaj xhamie. Ndonëse nuk kanë folur para kamerës së Klan Kosovës ata kanë shprehur dyshimet e tyre edhe mbi prejardhjen e fondeve për ndërtimin e xhamisë. “Emiratet e Bashkuara Arabe po e financojnë këtë xhami me 7 milionë euro”, ka treguar Rrahimi. “Kemi nevojë sepse 3 mijë veta falen në borë e shi”. Rrahimi ka thënë se edhe nëse qytetarët nuk e lejojnë ndërtimin e kësaj xhamie ata sërish do të falen në këtë parcelë. Ndërsa nesër do të mbahet mbledhja e Asamblesë Komunale në të cilën do të vendoset rreth kësaj çështjeje.

klankosova.tv