Vrasja te ish-blloku, Apeli lë të lirë Ervis Martinajn

Ervis Martinaj mbetet i lirë, pasi Gjykata e Apelit të Tiranës la në fuqi vendimin e dhënë nga Gjykata e Shkallës së parë. Kjo e fundit më 3 maj ndryshoi masën e sigurisë së Martinajt nga “arrest në burg”, në “liri në këmbim të garancisë pasurore” pas kërkesës së bërë nga avokatët mbrojtës. Ervis Martinaj, i vetmi që qëndronte në burg pas vrasjes që ndodhi në 4 tetorin e vitit të shkuar në zonën e ish-Bllokut dhe tronditi Tiranën, u la i lirë. Vendimi për lirinë e tij u dha nga Gjykata e Tiranës më 3 maj. Martinaj e la burgun në këmbim të një garancie pasurore prej 50 milionë lekësh të vjetra. Gjyqtari që dha vendimin, Artan Gjermeni, e ndryshoi masën e sigurisë nga “arrest me burg” në “liri në këmbim të garancisë pasurore” pas kërkesës së bërë nga mbrojtësit e Martinajt. Martinaj u arrestua në Spitalin e Traumës, pak orë pasi kishte dhënë dëshminë për ngjarjen e 4 tetorit. Ai ndodhej në mjekim në momentin e arrestimit, pas një përplasje me armë zjarri, ku mbeti i vrarë truproja i tij, Fabian Gaxha, dhe u plagos një tjetër shoqërues i tij, raporton Tch, transmeton Klan Kosova. Përplasja me armë zjarri ndodhi pas një konflikti mes Martinajt dhe Ervin Matës dhe shokut të tij ish-komando, Merviol Billo. Ky i fundit, i cili është shpallur në kërkim, dyshohet edhe në bazë të dëshmive të dhëna më parë nga dëshmitarët okularë se është personi që shkaktoi vrasjen e Gaxhës dhe plagosjen e dy të tjerëve. Në momentin e arrestimit, Martinaj ishte një ndër biznesmenët më të mëdhenj të kompanive të basteve në vend, të cilat u mbyllën nga qeveria në 1 janar të këtij viti.