Vikendi vendimtar për koalicionin VV-LDK

Sagës për arritjen e një marrëveshje për bashkëqeverisje ndërmjet Lëvizjes Vetëvendosje dhe Lidhjes Demokratike të Kosovës, duket se po i vije fundi. Tashmë që është caktuar për të hënën (03 shkurt 2020), të mbahet seanca plenare e Kuvendit për të votuar për Qeverinë e re, këtyre dy subjekteve politike u ka mbetur edhe kjo fundjavë për të vendosur nëse duan të bëjnë komporims për arritjen e një koalicioni apo përfundimisht të heqin dorë nga kjo përpjekje. Fillimisht posti i presidentit dhe ndarja e ministrive u bënë shkak për mosmarrëveshje; ndërsa tani ngërçi i vetëm po duket të jetë pozita e kryetarit të Kuvendit, shkruan Klan Kosova. Një muaj pas certifikimit të zgjedhjeve, Lëvizja Vetëvendosje e ka propozuar Glauk Konjufcën për kryetar Kuvendi dhe ky propozim u votua edhe nga deputet e zgjedhur të Lidhjes Demokratike të Kosovës me arsyetimin se LDK nuk është për bllokimin e formimit të institucioneve. Tashmë që kanë mbetur edhe dy ditë para seancës plenare, nënkryetari i LDK-së, Lutfi Haziri, ka thënë se të dyja partitë janë në përpjekje që gjatë kësaj kohe të mbetur t’i realizojnë angazhimet e tyre. “Jemi në përpjekje që sonte, nesër dhe pasnesër t’i realizojmë angazhimet tona të përbashkëta në definimin e rolit dhe përgjegjësive tona kushtetuese duke u pajtuar që Qeverinë e udhëheqë Lëvizja Vetëvendosje dhe kryeministri në ardhje Albin Kurti”.

klankosova.tv