Lajmet e fundit
Kryetari i Kuvendit të Kosovës, Kadri Veseli, sot ka bërë homazhe në përkujtim të 20 vjetorit të dëshmorëve të Brigadës “121 Kumanova” në Kleçkë, ku vlerësoi lartë kontributin e të rënëve për lirinë e Kosovës.
Ai tha se sot në Kleçkë përkujtojnë lavdinë dhe krenarinë e Ushtrisë Çlirimtare të Kosovës, që sipas tij, në këtë bjeshkë, Shtabi i Përgjithshëm e ka pasur selinë e vet qendrore dhe ka qenë strehë e dhjetëra mijëra qytetarëve gjatë luftës në këtë zonë.
“Këtë janë veteranët, këta janë luftëtarët e lirisë, në të njëjtën kohë këta janë ata të cilët e kanë mbrojtur me dhjetëra mijëra popullatë civile, e kanë mbrojtur që të mos futen forcat serbe, të gjithë strukturën drejtuese të shtabit të përgjithshëm të Ushtrisë Çlirimtare të Kosovës dhe Qeverisë së përkohshme të Kosovës. Kjo është lavdia jonë, kjo është historia jonë, ndërsa të tjerat shkojnë e vijnë”, deklaroi ai.
I pari i Kuvendit të Kosovës, kësaj ngjarjeje i ka kushtuar edhe një status në Facebook, ku shkroi: “Së bashku me qindra bashkëluftëtarë dhe qytetarë nga e gjithë Kosova, sot qëndruam në Kleçkën e lavdisë së UÇK-së. Nderimi për dëshmorët e lirisë është vlerë që na mban të fortë në rrugën e fuqizimit të shtetit, zhvillimit ekonomik dhe të ardhmes sonë të sigurt euro-atlantike”.
