Vdekja e punëtorit në Pejë, Prokuroria nis hetimet

Një ngjarje e rëndë ka ndodhur sot në fshatin Gllaviçicë të Pejës, ku një person e ka humbur jetën në vendin e punës. Për rastin tragjik tashmë kanë nisur hetimet nga Prokuroria. Kështu deklaroi për Klankosova.tv Shkodran Nikçi, zëdhënës i kësaj prokurorie. "Dy prokurorë të shtetit kanë dalë në vendin e ngjarjes ku ka humbur jetën një person. Bëhet fjalë për një punëtor i cili, si pasojë e plagëve të marra, ka humbur jetën. Në vendin e ngjarjes janë edhe shefi i drejtorisë rajonale të Pejës dhe hetuesit policorë, së bashku me Inspektoratin e Punës, duke i kryer ekzaminimet e nevojshme. Viktima është dërguar pa shenja jete në Spitalin Rajonal të Pejës”, deklaroi Nikçi për Klankosova.tv. "Trupi i pajetë i viktimës pritet t’i nënshtrohet procedurave të mjekësisë ligjore, ndërkohë që autoritetet po punojnë për të zbardhur nëse ka pasur shkelje të rregullave të sigurisë në punë", u shpreh ai. Derisa Klankosova.tv mëson se viktima është Beqir Vokshi. Ende janë të paqarta rrethanat në të cilën ka ndodhur rasti. https://klankosova.tv/tragjike-ne-peje-nje-person-humb-jeten-ne-vendin-e-punes11/