Vazhdojnë "reformat" e Elon Musk, punonjësve të Twitter-it ua heq edhe ushqimin falas

Punonjësit e platformës së Twitter-it që i mbijetuan pushimeve masive nga puna, së shpejti do të duhet të paguajnë vetë ushqimet e tyre, kjo pasi që shefi i ri Elon Musk tha se do të heqë shujtat  falas. Më konkretisht, vendimi i ri i Musk, vlen për selinë e Twitter në San Francisko, ngase sipas tij kjo po i kushton kompanisë së tij 13 milionë euro në vit, shkruan NYP, transmeton KlanKosova.tv. E një punonjëse e platformës në fjalë, e cila u largua posa Musk mori detyrën, ka mohuar pretendimet e tij duke thënë se vaktet falas i kushtojnë kompanisë jo më shumë se 25 dollarë për person në ditë. “Kjo është një gënjeshtër. Unë e drejtova këtë program deri një javë më parë, kur dhashë dorëheqjen sepse nuk doja të punoja për Elon Musk”, shkroi në Twitter Tracy Hawkins, ish-zëvendëspresidentja e transformimit të punës në Twitter. “Për mëngjes dhe drekë kemi shpenzuar 20-25 dollarë në ditë për person. Kjo u mundësoi punonjësve të punonin gjatë drekës. Pjesëmarrja ishte nga 20-50% në zyra”, ka përfunduar ajo. Musk përfundoi blerjen e tij prej 44 miliardë dollarësh të Twitter muajin e kaluar dhe shkarkoi menjëherë rreth gjysmën e fuqisë punëtore prej 7,500 personash.