Udhëtarja kapet me 11 kilogramë stoli argjendi në Aeroportin e Prishtinës

Në Aeroportin e Prishtinës, një udhëtare është ndaluar, mbrëmjen e së enjtes, nga oficerët doganorë nën dyshimin se po bartte me vete 11 kilogramë stoli argjendi të padeklaruar në doganë. “Njësitet Antikontrabande kanë ushtruar kontrolle tek udhëtarët të cilët udhëtonin nga Turqia përmes Aeroportit Ndërkombëtar të Prishtinës ku rreth orës 23:30 është selektuar një udhëtare e dyshuar për kontrolle detaje. Pasi që pala ka hyrë në kanalin e gjelbër është selektuar për skanim të valixhes dhe kontrolle, në njërën nga valixhet e saj përmes skanerit është vërejtur se ka mallra të cilat nuk janë deklaruar në doganë dhe pas verifikimit është konstatuar se ka stoli argjendi të padeklaruara. Gjithsej stoli argjendi 11.2 kg (unaza, vath, qafore, hallka dore, zingjire dore dhe qafe etj)”, thuhet në njoftimin e Doganës së Kosovës. Të gjitha mallrat sipas policisë, janë konfiskuar dhe ndaj udhëtares ka filluar procedura e rregullt kundërvajtëse.