Trump pret amerikanët e liruar nga Koreja e Veriut

Trump u shpreh se kjo “ishte një natë speciale për këta njerëz realisht të mëdhenj”, duke i pritur me duartrokitje teksa zbrisnin në bazën “Andrews” të Forcave Ajrore, pranë Uashingtonit. Shtëpia e Bardhë njoftoi se të tre ata u liruan si gjest i vullnetit të mirë përpara takimit të planifikuar mes presidentit Trump dhe udhëheqësit koreano-verior, Kim Jong-un. Presidenti amerikan deklaroi gjithashtu se vendi i samitit do të shpallej “brenda 3 ditësh”. Tre të liruarit, Kim Hak-song, Tony Kim dhe Kim Dong-chul, dolën të buzëqeshur dhe u shfaqën në gjendje të mirë shëndetësore, pavarësisht se ishin të dënuar me punë të detyrueshme dhe të rëndë në vendin komunist.