Trepça e mposht Yllin, shpallet kampione e Kosovës në basketboll

Trepça është shpallur kampione e Kosovës në basketboll. Skuadra mitrovicase arriti ta mposht Yllin, në një ndeshje dramatike në palestrën "Minatori". Rezultati përfundimtar i ndeshjes është 67:66. Për herën e fundit, "minatorët" titullin e fituan në vitin 2012-të. Çereku i parë u mbyll me epërsi prej gjashtë pikëve të suharekasve, por mitrovicasit shkrinë epërsinë në 10 minutëshin e dytë. I dyti u mbyll me rezultat të barabartë 30:30, kurse në të tretin suharekasit rikthyen epërsinë dhe avancuan 37:41. E në çerekun e fundit u shënuan shumë pikë. Ndërkaq fundi u bë dramatik me dy treshe të Alonso Verge, megjithatë të pamjaftueshmë për Golden Eagle Yllin. Kështu pas Kupës, Superkupës dhe Ligës Unike, Trepça e fiton edhe titullin e kampionit, duke e kompletuar një sezon spektakolar.