Thirrjet raciste në prani të Mickoskit, Bushati: E papranueshme heshtja - fakt se s'janë nxjerrë mësimet e së kaluarës

Ish-ministri i Jashtëm, Ditmir Bushati, ka reaguar për thirrjet raciste kundër shqiptarëve gjatë një ndeshjeje basketbolli në Maqedoninë e Veriut. Përmes një postimi në X Bushati shprehet se këto thirrje nuk janë vetëm fyese, por përbëjnë një kërcënim për bashkëjetesën demokratike dhe barazisë mes maqedonasve dhe shqiptarëve. “Ajo që ndodhi gjatë ndeshjes së basketbollit në Kumanovë ishte një manifestim i qartë i urrejtjes etnike. Thirrjet ‘Shqiptar i mirë, shqiptar i vdekur’ dhe ‘Dhoma gazi për shqiptarët’ nuk janë vetëm fyese, por përbëjnë një kërcënim serioz për bashkëjetesën demokratike dhe barazinë mes maqedonasve dhe shqiptarëve si dy komunitete shtetndërtuese në Maqedoninë e Veriut”, shkroi Bushati, transmeton Klankosova.tv. Tutje, ai u shpreh se heshtja e zyrtarëve të lartë që ishin dëshmitarë të kësaj, siç e quajti ai, “galerie turpi”, është e papranueshme. “Dëshmi e faktit se nuk kanë nxjerrë mësimet e duhura nga ngjarjet e hidhura të së kaluarës”, ka shkruar ai. Gjatë ndeshjes së basketbollit ku u bënë thirrjet raciste, i pranishëm ishte edhe kryeministri i Maqedonisë së Veriut, Hristijan Mickoski.