Thaçi: Të angazhohemi të gjithë për të pagjeturit

Presidenti Hashim Thaçi, ka kujtuar të pagjeturit në Ditën Ndërkombëtare të tyre. Ai ka thënë se të gjithë kanë përgjegjësi që kjo çështje të zbardhet sa më shpejtë. Më poshtë shkrimi i plotë i Thaçit: Dita Ndërkombëtare e të Pagjeturve na kujton edhe një herë dhimbjen që ndiejnë familjarët, por edhe e tërë shoqëria, nga kjo plagë e luftës që ende nuk është mbyllur. Na kujton edhe përgjegjësinë që e kemi të gjithë, edhe institucionet shtetërore, edhe liderët politikë. E tërë shoqëria duhet të angazhohemi sa më shumë që kjo çështje të mbyllet sa më parë. Unë mbetem i përkushtuar dhe në çdo instancë vazhdoj të kërkoj që çështja e të pagjeturve në Kosovë të zbardhet, për secilën familje, dhe kjo plagë të mbyllet. E përkrahi çdo iniciativë, në Kosovë dhe në botë, që synon të fuqizojë të drejtat dhe liritë e njeriut dhe që lufton praktikat e abuzimit dhe të shkeljes së të drejtave të njeriut që rezultojnë me zhdukjen e personave. Të gjithë duhet të gëzojnë të drejtën për drejtësi dhe për të ditur.

klankosova.tv