Thaçi bën thirrje: Rrini në shtëpi, mos lëvizni pa nevojë

Presidenti Hashim Thaçi ka falënderuar mjekët, infermierët dhe të gjithë ata që janë në vijën e parë të frontit në ‘luftën’ me pandeminë Covid-19. Ai nuk ka harruar që t’i falënderojë edhe gazetarët të cilët edhe i ka ftuar që t’i shmangin lajmet e rreme që përhapin panik. “Dëshiroj edhe njëherë të shpreh falënderimin për mjekët që po bëjnë punë heroike, infermierët, policët, ushtarët, të gjitha Njësitë Emergjente, punëtorët e KEK-ut, KEDS-it, bizneset, furrtarët, farmacitë, doganierët, kufitarët dhe të gjithë njerëzit që janë të angazhuar maksimalisht për tejkalimin e kësaj gjendje emergjente”. “Në të njëjtën kohë, ata po bëjnë punë të jashtëzakonshme ditë dhe natë, në të ftohtë dhe acar, shi dhe borë. Duhet t’i jemi mirënjohës dhe t’i falënderojmë gjithmonë”. “Dëshiroj të falenderoj edhe gazetarët që po rrezikojnë jetët e tyre për informimin korrekt. Ju ftoj që t’i mbysni lajmet e rreme që mund të krijojnë frikë dhe panik”. I pari i vendit u ka bërë thirrje qytetarëve që të rrinë në shtëpi, të mos bëjnë lëvizje të panevojshme dhe të zbatojnë rekomandimet e Institutit Kombëtar të Shëndetit Publik, njofton Klan Kosova. “Mesazhi kryesor nga unë si president për qytetarët dhe institucionet e vendit është: Dëgjoni me kujdes rekomandimet e Institutit Kombëtar të Shëndetit Publik. Këto rekomandime janë përtej çdo agjende politike. Janë rekomandime për shëndetin tuaj, të familjes dhe të shoqërisë. Janë rekomandime për të mirën e të gjithëve. Janë rekomandime për jetën tonë”. “Mënyra më e mirë për të luftuar virusin Covid-19 është: Rrini në shtëpi, mos lëvizni pa nevojë. Mos bëni lëvizje që nuk janë të nevojshme për ju, për familjen tuaj, shoqërinë, shtetin dhe institucionet. Preventiva më e mirë për t’i ikur të keqes është të rrini në shtëpi me të dashurit tuaj”. “Disiplina dhe sakrifica juaj duke qëndruar në shtëpi ju ruan shëndetin tuaj, të familjarëve dhe tërë shoqërisë. Po e përsëris: Rrini në shtëpi me qetësi. Mos dilni pa nevojë. Nuk është koha për agjenda politike, por mbi të gjitha për shëndetin qytetar”.