Lajmet e fundit
Një shfaqje teatrale në Elbasan u kthye në një protestë politike. Spektatorët në sallë reaguan me thirrje antikomuniste duke debatuar edhe me aktorët realizues të pjesës teatrale me titull, “Ata hynë pa trokitur”.
Ambasadori i OSBE-së, i pranishëm në këtë shfaqje, tha se i gjithë projekti është për të nxitur dialogun dhe kjo ndikoi edhe në reagimin qytetar.
“Është nismë e OSBE e mbështetur nga ambasada gjermane dhe të flasim për të kaluarën. Ne kemi bërë një nismë që shqiptarët të flasin për të kaluarën, diskutojnë, kundërshtojnë, por të hapin një dialog të sinqertë. OSBE jep mbështetjen, por nuk e diskuton”
Ndërsa më i drejtpërdrejtë u tregua Alfred Trebicka, i cili u bëri thirrje qytetarëve të ruhen nga ata që hyjnë pa trokitur sot.
“Një nga pikësynimet tona nuk ka qenë sjellja e një panorame për vitet e komunizmit, por një apel për ata që hyjnë pa trokitur, hynë dje, hyjnë sot dhe do të hyjnë edhe nesër pa trokitur”, tha ai.
Vepra e paraqitur në teatrin Skampa me autor dhe regjisor Armand Borën, është reflektim i së shkuarës komuniste në Shqipëri. Ajo vjen nën interpretimin e aktorëve Alfred Trebicka dhe Rozi Kostani dhe pritet të udhëtojë në disa qytete./tch
