Të dyshuarit për vrasjen e policit Muhamed Lika ende në arrati

Mbrëmjen e 1 prillit, në hyrje të banesës së tij në Kaçanik, mbeti i vrarë Muhamed Lika, pjesëtar i Policisë së Kosovës. Deri më tani, të dyshuarit për vrasjen e tij nuk janë kapur. Këtë për Klankosova.tv e konfirmoi zëdhënësi i policisë për rajonin e Ferizajt, Kanun Veseli. Muhamed Lika u varros të mërkurën në "varrezat e dëshmorëve" me nderime të larta. Sakaq, dje, gjatë një konference për media, kryeprokurori Burim Çerkini tha se vrasja e rreshterit mund të ishte e planifikuar. “Të dyshuarit nuk kanë përdorur maska, por kapela. Ka qenë errësire dhe identifikimi bëhet më i vështirë. Nuk ka të bëjë me ndonjë pistë të grabitjes, nuk ekziston ndonjë pistë që të dyshuarit kanë pasur për qëllim grabitjen. Vërehet qartë që qëllimi i tyre ka qenë ekzekutimi i rreshterit”, pati thënë Çerkini. I ndjeri Lika la pas vetës gruan, dhe nuk kishte fëmijë.