Të dielën PS mbledh Asamblenë, Rama kërkon mbledhje të mbyllur

Një vit përpara zgjedhjeve parlamentare, socialistët do të rifreskojnë strukturat brenda partisë. Për këtë, kryeministri i Shqipërisë, Edi Rama këtë të diel ka thirrur Asamblenë Kombëtare. Në mesazhin që sekretari i përgjithshëm, Blendi Klosi i ka dërguar anëtarëve, thuhet se në fokus është rienergjizimi i partisë në kuadër të detyrave të lëna nga Kongresi i 8 dhjetorit. Klosi iu ka kujtuar anëtarëve se mungesat janë të pajustifikuara dhe se pjesëmarrja është e detyrueshme. Brenda muajit mars duhet të përfundojë zgjedhja e kryetarëve të degëve, për t’i lënë vendin më pas delegatëve të Kongresit, Asamblesë e në fund Kryesisë së re. Euronews Albania ka mësuar se mbledhja që do të nisë në orën 11:00 do të zhvillohet me dyer të mbyllura dhe se kjo ka qenë kërkesë e vet Ramës, transmeton Klankosova.tv. Kjo është hera e dytë pas 26 korrikut të vitit të kaluar që mbledhja e Asamblesë së kësaj force politike zhvillohet jo e hapur për mediat. Veç zgjedhjeve brenda partisë, Rama pritet të përcjell edhe mesazhe për të vetët. Hera e fundit kur socialistët mblodhën Asamblenë ishte në 4 shtator, ku kryeministri Rama njoftoi edhe ndryshimet në kabinetin qeveritar.