"Synimi ynë është të futemi në Bundesliga", Emir Sahiti flet për karrierën e tij te Hamburgu (VIDEO)

Për një dekadë, luajti në futbollin kosovar për skuadrat si Prishtina dhe Trepça. Por, tani Emir Sahiti, po e shkruan historinë në Gjermani me fanellën e Hamburger SV, që është në luftë për t'u shpallur kampion i Bundesliga 2. Sahiti i realizoi dy gola kundër Schalke 04, një tjetër klub i madh gjerman. Ai ekskluzivisht në emisionin Sports Show në Klan Kosova, foli rreth karrierës së tij. "Nuk është lehtë të luash. Është klub i madh, me tifozë, me presion shumë të madh, synimi ynë është gjithqysh të futemi në Bundesligë edhe shpresojmë. Na kanë mbetur edhe katër ndeshjet e fundit, kemi rënë në pozitën e dytë, por vetëm një pikë është Kolni më lartë se ne", deklaroi ai. Sulmuesi kosovar theksoi se ka raporte të mira edhe me futbollistët e tjerë shqiptarë atje. Sipas tij, Bundesliga 2, ka ekipe jashtëzakonisht të forta si: Schalke, Dusseldorf, Koln, Hannover e shumë të tjera. "Futbolli këtu është më i shpejtë, më taktik, duhet të jesh i fokusuar dhe shumë punëtor", theksoi ai në Klankosova.tv. https://www.youtube.com/watch?v=DfzhEXbGpjo