Studentet zbulojnë në autobus se ishin nga e njëjta jetimore

Dy studente të një Universiteti në Virxhina filluan një bisedë në një autobus dhe shpejt zbuluan se ato kishin jetuar në të njëjtën jetimore në Kinë, 15 vjet më parë, transmeton Klan Kosova. Ally Cole u ul pranë Ruby Wierzbicki në një autobus që kalonte kampusin e shkollës dhe filluan një bisedë. Gratë zbuluan se të dyja ishin adoptuar nga Kina dhe morën celularët e tyre për të krahasuar fotografitë kur zbuluan se ishin nga i njëjti qytet, Jinan. Fotot treguan të njëjtën jetimore. “Ne i mbajtëm fotot krah për krah në celularët tanë dhe kuptuam se gjithçka përputhej dhe e dinim që duhej të ishte i njëjti vend”, tha Wierzbicki në një njoftim për shtyp. Studentet vendosën që ato ishin birësuar në moshën 6 dhe 4 vjeç, dhe madje kishin fotografi që i tregonin së bashku. Ato thanë se nuk besojnë se takimi i tyre në autobus ishte një ngjarje e thjeshtë. “Ka njerëz me të cilët kam biseduar në lidhje me këtë dhe ata kanë thënë, ‘Çfarë një rastësie’. Por ne mendojmë se ky është 100% Zoti”, tha Wierzbicki. “Nuk ka asnjë mënyrë që dy njerëz që ishin në të njëjtën jetimore në një vend tjetër mund të përfundojnë disi në të njëjtën shkollë në të njëjtën kohë dhe të mos jetë Zoti”.