S'ndalet Ylli, gjunjëzon edhe Vëllaznimin dhe e largon nga gara për pozitën 4

E pesta radhazi për Golden Eagle Yllin! Kjo skuadër po e vazhdon formën fantastike në ProCredit Superligën e Kosovës në basketboll, duke e mposhtur sonte edhe Vëllaznimin në palestrën "13 Qershori" në Suharekë, 86-63. Seria pozitive e "Xhebrailave" nisi ndaj kampionëve aktualë të Trepçës (82-74), vazhdoi në kryeqytet kundër Prishtinës (62-85), në Suharekë e mposhtën Pejën (72-64) e në Prizren e mundën Bashkimin (78-84), raporton Klankosova.tv. Nga ana tjetër, gjakovarët që triumfuan në Ligën Unike, tashmë e kanë humbur luftën për pozitën e katërt në kampionat, për të cilën Ylli mbetet në garë vetëm me Pejën. Basketbollisti më i mirë i ndeshjes së sotme ishte Jalen Nesbitt me 19 pikë, 11 kërcime e shtatë asistime. Te mysafirët lojtari më i dalluar ishte Antwan Walker me 21 pikë e 3 kërcime. 24-11 përfundoi 10 minutëshi fillestar, derisa edhe perioda e dytë i takoi ish-kampionëve të Kosovës, 28-22, për të shkuar në pushim me shifrat 52-33. Aq pikë sa i realizoi Vëllaznimi në çerekun e dytë, të dyja ekipet i shënuan në të tretin, që u mbyll 11-11, kurse edhe i fundit i takoi fituesve të kësaj përballje, 23-19, raporton Klankosova.tv. Suharekasit me 41 pikë, tani gjenden në vendin e katërt në tabelë, por atë mund ta ruajnë vetëm nëse nesër Peja humb nga Trepça në "Karagaç", në të kundërtën pejanët e rimarrin këtë pozitë, derisa epilogu përfundmitar mbetet pastaj të vendoset në xhiron e fundit. [caption id="attachment_2541457" align="alignnone" width="2000"] Elita basketbollistike e Kosovës, transmetohet ekskluzivisht në ArtMotion dhe Kujtesa![/caption]