Lajmet e fundit
Kuvendi komunal i Skënderajt në seancën e rregullt të muajit shtator sot ka miratuar buxhetin për vitin 2017 i cili kap shifrën prej 11.932.216 euro.
Më këtë rast, Nënkryetari i Komunës së Skënderajt Fadil Nura, para anëtarëve të Kuvendit ka prezantuar objektivat e realizimit të buxhetit, duke u ndaluar në prioritetet e Komunës së Skënderajt për vitin 2017, të cilat janë shumë sektoriale, transmeton Klan Kosova.
Ai para kuvendarëve ka theksuar se Buxheti për vitin 2017 do të jetë gjithëpërfshirës, në raport me politikat investive dhe buxhet i zhvillimeve pozitive në shumë fusha të jetës së qytetarëve të Skënderajt.
“Në procesin e hartimit të buxhetit për vitin 2017 dhe parashikimet për vitet 2018 dhe 2019, janë marrë parasysh foktorë të ndryshëm dhe sidomos nevojat e qytetarëve për projekte kapitale. Investimet kapitale janë fokusuar në financimin e projekteve infrastrukturore; në kanalizime dhe ujësjellës, si dhe në disa projekte rrugore të lagjeve”, theksoi Nura.
Nura ka siguruar anëtarët e Kuvendit se qeveria lokale e Skënderajt do të vazhdojë të kursej me ngulmë buxhetin e paraparë për mallra dhe shërbime, pa cenuar funksionimin normal të institucioneve dhe sektorëve të caktuar. Ai e theksoi si të rëndësishëm edhe fokusimin në subvencionimet në bazë të mundësive financiare në kulturë, sport, bujqësi dhe arsim. Vlera totale e subvencioneve për vitin 2017 do të jetë 180.000 euro.
Në kuadër të subvencionimit, Komuna e Skënderajt edhe gjatë vitit 2017 do të subvencionojë në bujqësi, në kulturë, rini dhe sport, si dhe në ndihmë nxënësve me gjendje të rëndë ekonomike. Po ashtu kjo komunë ka paraparë për vitin 2017 edhe fonde të shpronësimit, të cilat do të përdorën me rastin e realizimit të projekteve me interes publik, siç është rasti i projektit të rrugës unazore “17 Shkurti” në qytet dhe projekteve të tjera të rëndësishme që kërkojnë fonde të tilla.
Në fushën e ambientit Komuna e Skënderajt ka planifikuar për vitin e ardhshëm fonde edhe për sigurimin e kontinjerëve për mbeturina me qëllim të përmirësimit të gjendjes në këtë fushë. Buxhet është miratuar sot pasi ka kaluar të gjitha fazat e hartimit të tij të parapara edhe me ligj. Këshilltarët komunalë pas diskutimeve për aspekte të ndryshme të realizimit të tij, e kanë miratuar ata duke e përgëzuar qeverisjen lokale për transparencë në gjithë procesin buxhetor.
