Sipas akademikut turk, Sami Frashëri nuk e shkroi “Shqipëria ç’ka qenë, ç’është dhe ç’do të bëhet”

Akademiku turk, Yuskel Tapalogu, ka deklaruar se vepra më e rëndësishme e eruditit shqiptar dhe arkitektit të kombit shqiptar, Sami Frashëri, “Shqipëria ç’ka qenë, ç’është dhe ç’do të bëhet”, mund të mos jetë fare e tij. Turku këto pretendime i ka ngritur derisa ka folur për Top Channel, në një simpozium për rilindësin shqiptar, midis Universitetit të Tiranës dhe atij të Trakës në Turqi. “Vepra në fjalë mund të jetë e Sami Frashërit, por edhe mund të mos jetë. Unë kundërshtoj shqiptarët që thonë se, patjetër që është e Samiut, sepse kjo është botuar në Bukuresht në një formë joformale. Në 1889-n është bërë përkthimi në turqisht. Sami Frashëri ishte vetë gjallë dhe kurrë nuk bëri një deklarim nëse vepra ishte e tij apo jo”, tha Profesor-doktor Yuskel Tapalogu. Por, dekani i fakultetit të Historisë dhe Filologjisë në Tiranë, Shezai Rrokaj, ka thënë se s’ka as më të voglin dyshim se vepra është e Samiut dhe se figura e tij prej kolosi nuk duhet të ndahet e përlyhet. “Nuk ka dyshim për studiuesit tanë që kjo vepër është e Sami Frashërit. Njerëz të këtyre përmasave nuk duhen parë të ndarë midis kombesh”, deklaroi Profesor-doktor, Shezai Rrokaj.