Pas ngjarjes tronditëse në Ekuador ku bandat e drogës hynë në studion e një prej programeve më të ndjekur në vend si “El Noticiero”, “The Economist” i ka kushtuar një analizë mafisë në Ekuador dhe konkretisht asaj shqiptare.
Sipas “The Economist”, mafia shqiptare ka zgjeruar prezencën edhe në Ekuador, ku një faktor që ka ndikuar është edhe lehtësia me të cilat lëshohen vizat për të huajt në këtë vend.
“Mafia shqiptare ka zgjeruar prezencën edhe në Ekuador. Një fluks kaq i shpejtë i krimit të organizuar ndërkombëtar u lehtësua nga ekonomia e dollarit në Ekuador dhe nga kontrolli i dobët mbi kërkesat për viza nga të huajt”, shkruan “
The Economist”, transmeton Rtsh.
Sipas medias prestigjioze, gangsterët ekuadorianë si Macias janë bërë mbretër. Ndërsa Los Choneros dhe “bandat e tjera lokale mendohet se janë armatosur nga klientët e tyre meksikanë për dërgesa kokaine. Ata tani kanë mitralozë, pushkë dhe granata që u mundësojnë të përballen me forcat e armatosura të Ekuadorit të trajnuar dobët”.
“Bandat ekuadoriane kanë gjeneruar fluks parash duke krijuar një terren fitimprurës në Evropë, ku konsumi i kokainës po rritet. Rruga më e ngarkuar e trafikut të kokainës në botë sot shkon nga Guayaquil në portin e Antwerpit në Belgjikë, sipas Chris Dalby nga World of Crime, një grup hetimor në Holandë”, shkruhet më tej në analizën e The Economist.
Ndërkohë dje Policia e Shtetit bëri të ditur një megaoperacion që kishte zhvilluar bashkë me policinë e Belgjikës ku 18 persona u vendosën në pranga, midis tyre 12 shqiptarë.
Operacioni policor i koduar “Antwerp” ka goditur një organizatë kriminale që drejtohej nga shtetas shqiptarë, me bazë në Antwerp, Belgjikë, që trafikonte drogë dhe armë nga Amerika e Jugut në Belgjikë.
Eksperti Will Freeman, shpjegon edhe se si lëviz droga nga Amerika e Jugut drejt Evropës.
“Pjesa më e madhe e kësaj kokaine paketohet në kontejnerë transporti që përmbajnë banane, një nga eksportet më të mëdha të Ekuadorit. Kërkesa e Evropës i ka kthyer portet ekuadoriane në një nga pjesët më të vlefshme të infrastrukturës për grupet e trafikut të drogës në Amerikën Latine”, thotë Freeman, i Këshillit për Marrëdhëniet me Jashtë në Nju Jork.
Një e katërta e 36 burgjeve të Ekuadorit organizon sulme dhe rekruton anëtarë të rinj në bandat kriminale, ndërsa ka një rritje të korrupsionit të zyrtarëve të lartë teksa në vitin 2023, policia filloi të hetonte disa zyrtarë qeveritarë për lidhje me mafinë shqiptare.
Në vitin 2022, 25 zyrtarë të forcave ajrore u dënuan për sabotimin e pajisjeve të radarëve që monitoronin aktivitetin e bandave të drogës në hapësirën ajrore të Ekuadorit. Kushdo që i kundërvihet bandave të drogës dhe rrjeteve të tyre të korruptuara është në rrezik.
Në vitin 2019, Ekuadori pretendohej se ishte një nga vendet më të sigurta në Amerikën Latine, me një shkallë vrasjesh prej 6.7 për 100,000. Por të dhënat e fundit tregojnë se në vitin 2023 shkalla e vrasjeve është rritur më shumë se gjashtëfish, në 45 për 100,000, duke e bërë këtë vend më vdekjeprurësin në Amerikën Latine kontinentale.
