Shqiptarët gati për të avancuar në eliminatoret evropiane

Barazimi pa gola ndaj Larnes në “Ballymena” të Irlandës së Veriut, ka krijuar gjasa të mira që Prishtina ta sigurojë kalimin në rrethin e tretë eliminator të Konferencës së Evropës. Çdo fitore në ndeshjen e kthimit që zhvillohet në stadiumin “Fadil Vokrri” në kryeqytet, do ta kualifikonte skuadrën më të trofeshme kosovare, raporton Klankosova.tv. Me mbështetjen e “Plisave” dhe mbarë tifozëve në këtë duel, kryeqytetasit i kanë mundësitë reale për të kaluar tutje. Edhe më të mira shanset janë për Ballkanin. “Xhebrailat” duhet ta ruajnë avantazhin komod prej dy golave të arritur të martën, kur e mundën Florianan malteze me rezultat 4-2. Suharekasit në të gjitha pjesëmarrjet e tyre evropiane, kanë luajtur në raundin e tretë të UEFA Europa Conference League, ku fare pranë janë edhe këtë vit ta bëjnë një gjë të tillë, njofton Klankosova.tv. Nga ana tjetër, kampionia e Kosovës do të vazhdojë të garojë në nivele më të larta, krahasuar me UECL-në. Dritës i duhet një mrekulli në ndeshjen kthyese të Ligës së Kampionëve ndaj Kopenhagës, pasi në Danimarkë humbi 2-0. Eliminimi eventual do t’i dërgonte gjilanasit në gjysmëfinalen kualifikuese të Europa Ligës, aty ku e pret humbësi i duelit Steaua – Shkëndija. Këta të fundit e fituan përballjen e parë 1-0 ndaj rumunëve. Pos këtyre katër ekipeve shqiptare, kampanjën evropiane po e menaxhojnë mirë edhe klubet nga Shqipëria, të cilët po garojnë në Konferencë. Kampionët e Egnatias e mundën Dinamo Minskin si mysafirë 0-2, duke krijuar qetësi për duelin e kthimit në Rrogozhinë. Jashtë fushës së tyre triumfuan edhe futbollistët e Dinamos së Tiranës. Nëndetësja e udhëhequr nga Ilir Daja, fitoi 1-2 në Andorrë ndaj Atletic Escalades, kurse me të njëjtin rezultat, fitore mori edhe Vllaznia e Shkodrës në “Loro Boriçi” kundër Vikingur Reykjavik nga Islanda. I vetmi klub i ‘shqipeve’ që pësoi në këtë fazë, është Deçiqi i Tuzit. Ata u mundën 0-2 prej Rapidit austriak./Klankosova.tv