Shpend Ahmeti: “Ndeshja e Yjeve” do të bëhet aktivitet tradicional

Kryetari i Komunës së Prishtinës, Shpend Ahmeti, i cili është bashkorganizator i “Ndeshjes së Yjeve” ku kësaj radhe pritet të përballen skuadra e Granit Xhakës dhe Milot Rashicës, ka thënë se ky aktivitet do të organizohet edhe në vitet e ardhshme. Ai ka thënë se të hollat që do të mblidhen nga shitja e biletave për këtë ndeshje, do t’u dedikohen familjeve dhe personave me nevojë, transmeton Klan Kosova. "Së pari dua t’i falënderoj yjet që kanë pranuar të jenë pjesë e Ndeshjes së Yjeve. Sot e kaluam gjithë ditën me ta duke diskutuar për formacionet dhe detajet e tjera të kësaj ndeshje. Ndeshja do të jetë gjithçka përveç miqësore sepse të dyja palët janë të interesuara që të fitojnë". "Kemi futbollistë edhe të Kombëtares së Shqipërisë si Yll Lenjani. Kemi edhe këngëtarë që do të jenë me neve këtu në fushë. Ende nuk i kemi formacionet e sakta sepse duam ta mbajmë sekret për skuadrën kundërshtare". "Ka pasur interesim të jashtëzakonshëm për të marrë pjesë në këtë ndeshje. Shumica e futbollistëve që pritet të marrin pjesë në këtë lojë, janë lojtarë që po vazhdojnë të na e zbardhin fytyrën nëpër botë". "Meqenëse këtë ndeshje e kemi organizuar ne si Komunë e Prishtinës; kemi mundur ta bëjmë edhe pa të holla. Por kemi dashtë që bashkë me lojtarët t’i japim kësaj ndeshje një karakter humanitar. Të hollat e grumbulluara nga biletat (me çmim prej dy eurosh) do të shkojnë për familjet në nevojë". "Nuk ka qenë aspak e vështirë t’i bindim yjet që të vijnë këtu. Graniti e ka shtyrë edhe pushimin për të qenë këtu me ne. Prandaj i falënderoj ata në emër të qytetarëve të Kosovës që po na japin këtë kënaqësi". "Besoj që për vitin tjetër do t’i fillojmë organizimet sivjet nga muaji dhjetor. Do ta përgatisim këtë lojë në mënyrë që t’iu mundësojmë edhe të tjerëve të jenë pjesë e kësaj loje. Patjetër se do të bëhet tradicionale".

klankosova.tv