Shkurtimi i fondeve për Serbinë, deputetja britanike: BE-ja po zgjohet

Deputetja britanike, Alicia Kearns, ka komentuar lajmin se Bashkimi Evropian po shqyrton mundësinë që t’ia shkurtojë fondet Serbisë, për shkak të ngecjes sa i përket demokracisë dhe lidhjeve të ngushta me Rusinë. Kearns ka thënë se Brukseli më në fund po zgjohet nga gjumi sa i përket Serbisë. “Brukseli më në fund po zgjohet ndaj vdekjes së ngadaltë të lirisë së medias dhe sundimit të ligjit në Serbi. Veprimet kanë pasoja, dhe mbrojtja e lirisë së shtypit duhet të jetë e panegociueshme në pragun e Evropës, e lëre më për çdo anëtarësim të ardhshëm”, ka shkruar Kearns në platformën “X”. Komisionerja për zgjerim e BE-së, Marta Kos, për “Politico” ka thënë se BE-ja është e shqetësuar me atë që po ndodh në Serbi, duke shtuar se Komisioni Evropian po vlerëson nëse shteti serb ende i përmbush kushtet për të marrë fondet nga instrumentet financiare të BE-së. Serbia po përballet me humbje të fondeve deri 1.5 miliardë euro. /Klankosova.tv

Brussels is finally waking up to the slow death of media freedom and the rule of law in Serbia.

Actions have consequences, and defending press freedom must be non-negotiable on Europe's doorstep let alone for any future membership.https://t.co/ZThs6x9RP9 — Alicia Kearns MP (@aliciakearns) April 12, 2026