Shifra e votuesve në Venezuelë është e manipuluar

Rezultatet për votimin e diskutueshëm të së dielës në Venezuelë janë "të manipuluara", ka pohuar kompania që e ka ofruar sistemin e votimit.

Autoritetet zgjedhore të Venezuelës thanë se më shumë se tetë milionë njerëz votuan në zgjedhje për Asamblenë Kushtetuese.

Por Drejtori Ekzekutiv i Smartmatic, Antonio Mugica tha se pjesëmarrja aktuale ndryshon për të paktën një milion, transmeton Klan Kosova.

“Është për keqardhje që ne duhet të raportojmë se numrat e daljes në votim të dielën më 30 korrik për Asamblenë Kushtetuese në Venezuelë janë manipuluar" tha Mugica. Ai shtoi se megjithëse kompania e tij kishte regjistruar numrin e vërtetë të votuesve, një auditim i plotë do të duhej të zhvillohej përpara se të jepej një shifër e saktë.

Opozita që bojkotoi zgjedhjet ka thënë gjithashtu se shifrat ishin të fryra duke deklaruar se 88% e votuesve kishin abstenuar duke refuzuar kështu të njohë sondazhin derisa zyrtarët zgjedhorë thanë se pjesëmarrja ishte 41.5%.

Presidenti i Venezuelës, Nicolas Maduro tha se sondazhi ishte një “votë për revolucionin” derisa kritikët e akuzojnë presidentin për mashtrim dhe kërcënim të votuesve dhe shumë prej tyre nuk besojnë në numrin zyrtar të pjesëmarrjes së votuesve.

Asambleja Kushtetuese e Venezuelës do të ketë fuqinë për të rishkruar Kushtetutën dhe për të shpërndarë Asamblenë Kombëtare të kontrolluar nga opozita.