Organizata Panamerikane e Shëndetësisë (PAHO) paralajmëron për një rritje të fortë të rasteve të fruthit në Amerikë, duke kërcënuar statusin e eliminimit në ShBA dhe Meksikë. Vetëm tre javët e para të 2026-së regjistruan 1,031 raste, ndërsa gjatë 2025 u konfirmuan 14,891.
Shpërthimet më të mëdha janë në Amerikën e Veriut. Në ShBA u regjistruan 2,242 raste në 2025, duke përfshirë një shpërthim të madh në Karolinën e Jugut me 876 raste, ndërsa në Teksas dy fëmijë të pambrojtur vdiqën, raporton “Al Jazeera”, transmeton Klankosova.tv.
Në Meksikë, 6,428 raste u raportuan vitin e kaluar dhe 740 të tjera vetëm në tre javët e para të 2026-së.
Fruthi është një virus ngjitës që mund të shkaktojë komplikime serioze, por mund të parandalohet plotësisht me vaksinën MMR. Organizata Panamerikane e Shëndetësisë ka kërkuar përforcim të vaksinimit dhe monitorimit epidemiologjik dhe shqyrtim të situatës në ShBA dhe Meksikë. /Klankosova.tv
●●●
ASHKRIMI NGA
A
Editorial nga Klan Kosova — ndjek lajme dhe zhvillimet e tjera kryesore të vendit.
