Reagon sërish Hollaj: Presidenten e ftuat veç për formalitet që sot të dilni me manipulime të tilla

Përderisa shefja e GP të LVV-së, Arbërie Nagavci, gjatë një konference për media tha se partia e saj ia ka ofruar Vjosa Osmanit nënshkrimet për ta rikandiduar edhe për një mandat, këtë e demantoi shpejt Shefja e Stafit të Presidencës, Learta Hollaj. Në një postim në Facebook, ajo tha se kjo “është gënjeshtër”. Ndërkaq, Nagavci, gjatë konferencës u pyet për reagimin e Hollajt, ndërsa tha se “Zonjës Learta dhe Zonjës Presidente sot ua garantoj nënshkrimet për të vazhduar me garë”. Në ndërkohë, reagoi edhe këshilltarja e Osmanit, Egnesa Vitia, e cila për Klan Kosova tha se LVV-ja i ka kërkuar Presidentes të hyjë në garë si kundërkandidate e Glauk Konjufcës “vetëm sa për kuorum”. “E nëse nuk bëhet as atëherë kuorumi, dalim e fajësojmë opozitën që ata na dërguan në zgjedhje. Pra, kurrë s’i kanë ofruar përkrahje për t’u rizgjedhur”, ka thënë Vitia për Klan Kosova. Reagim bëri edhe zëdhënësi i Qeverisë, Arlind Manxhuka, i cili tha se “nëse shefja e zyrës së Presidentes ka dyshime se nuk i kemi premtuar Presidentes 30 nënshkrime, e ftoj që sonte të vijë në zyret e Lëvizjes, do t’i ketë edhe 3 më shumë se kandidati Glauk Konjufca, pra 33”. Ndërkaq, Hollaj u prefshi sërish në këtë debat, duke i reaguar sërish Nagavcit. “Nëse dikujt i thoni eja veç sa për formalitet bëhu kundërkandidate e z. Glauk Konjufca, pra veç sa për numër, në mënyrë që pastaj të mund ta fajësojmë së bashku opozitën për shkuarje në zgjedhje, a ka më turp? Pra Presidentes nuk i keni ofruar asnjë votë për t’u rizgjedhur por i keni kërkuar që të bëhet formalitet e numër në mënyrë që sot të dilni me manipulime të tilla”. “Ne nuk i trajtojmë institucionet e shtetit ashtu”, shkroi Hollaj në Facebook. Ajo i tha Nagavcit se “përvoja juaj parlamentare dhe politike është e mjaftueshme për ta trajtuar këtë çështje me seriozitetin që kërkon pesha kushtetuese dhe interesi qytetar e shtetëror”. “Kjo nuk është çështje e thjeshtë e aritmetikës procedurale apo administrative, por temë që prek thelbin e përgjegjësisë institucionale dhe respektimin e rendit kushtetues. Prandaj, qasja duhet të reflektojë maturi politike dhe ndjeshmëri ndaj interesit publik, përtej kalkulimeve të ulëta”, theksoi ndër të tjera Shefja e Stafit të Presidencës, Learta Hollaj. /Klankosova.tv https://klankosova.tv/presidenca-demanton-lvv-ne-per-ofrimin-e-nenshkrimeve-kjo-eshte-genjeshter/ https://klankosova.tv/vv-i-ofron-osmanit-nenshkrimet-presidentja-i-refuzon/