“Rasti 11-vjeçarja”: Të dyshuarve për dhunim iu vazhdohet paraburgimi edhe për dy muaj

Katër të dyshuarve për dhunimin e vajzës së mitur, rast ky i njohur si “rasti 11-vjeçarja”, sikurse edhe tre të pandehurve tjerë të përfshirë në këtë çështje penale, u është vazhduar paraburgimi edhe për dy muaj. Kështu ka konfirmuar për Klankosova.tv Gjykata Themelore në Prishtinë, e cila vendimin e ka marrë në bazë të kërkesës së Prokurorisë Themelore në Prishtinë. “Gjykata Themelore në Prishtinë – Departamenti për Krime të Rënda me datë 24.02.2025 ka marrë vendim dhe ka aprovuar kërkesën e PTHP për vazhdimin e masës së paraburgimit në çështjen penale ndaj të pandehurve V.A., P.SH., L.A. dhe G.H”. “Të pandehurve V.A., P.SH., L.A. dhe G.H. ju është vazhduar masa e paraburgimit edhe për dy muaj për secilin, përkatësisht deri me datën 26.05.2025”, ka konfirmuar gjykata për Klan Kosova. Në njoftim u tha se “masa e paraburgimit iu është vazhduar edhe tre të pandehurve të tjerë, të cilët janë të përfshirë në këtë çështje penale”. Kujtojmë se vajza e cila në moshën 11-vjeçare u dhunua nga 10 burra e djem në qershor e gusht të vitit 2022, dyshohet se u dhuna sërish gjatë këtij fillimviti. Siç ka raportuar Klan Kosova, dyshohet se e mitura u dhunua në fillim të muajit shkurt 2025, derisa ishte lajmëruar si e zhdukur, raporton Klankosova.tv. Siç pati marrë vesh televizioni, numri i të dyshuarve ka qenë dyshifror. Gjithnjë sipas burimeve, dyshohet se vetëm për një natë, plot tetë burra kanë kryer marrëdhënie seksuale me të. Dhunimi i të miturës rreth tre vjet më parë, kishte nxitur protesta masive në Prishtinë. /Klankosova.tv https://klankosova.tv/e-mitura-e-dhunuar-nga-10-persona-ne-2022-en-dyshohet-se-ra-viktime-edhe-e-8-te-tjereve/ https://klankosova.tv/ri-dhunimi-i-11-vjecares-prokuroria-konfirmon-klanin-3-ne-paraburgim-4-te-tjere-ne-seance-degjimore/ https://klankosova.tv/seanca-per-dhunimin-e-11-vjecares-kater-te-dyshuarve-u-caktohet-paraburgimi-per-30-dite-video/